ЭНДИ УОРХОЛ

Бірде әлдеңені сындырып алдым. Сосын өмірімнің қаншалық сынғыш екенін жадымда тұту үшін жетісіне бір қандай да бір затты сындырып тұру қажет екенін ұқтым.

Өмір сүру жасы ұзарғандықтан, сәби қалпымыздың да ұзарғанын қалар едім. Жұрт секс жөнінде он бес жасында біліп, отыз бесінде қайтыс болған заманда, әлбетте, мәселе көп туындамағаны анық. Алайда секс туралы сегіз жасында құлағдар боп, сексен жасқа дейін өмір сүретін замандастарымның жағдайы мәз емес. Бұл миға қондырып алған бір ғана идеямен өмір сүру үшін тым ұзақ уақыт.

Нағыз туындыгер жұртқа керек емес дүниені тудырады. Бірақ ол осы бір өнерін халыққа паш ету керегін сезеді. Оның маңдайына жазылғаны осы.

Адамға қарызын қайтарып берген соң, ол жанды кездейсоқ кезіктіріп қалмайсың. Бірақ қарызды қайтармай тұрғаныңда қайда қарасаң да сол кісі жүретіні қызық.

Жексенбіні жек көремін. Өйткені бұл күні кітап және гүл дүкендерінен басқаларының бәрі жабық тұрады.

Қазір Италияда тамақ пен киім-кешектің көп түрін шығарды. Бірақ аталған екеуден бөлек адамға тағы баспана керек. Италиялықтар баспана соқпайды, өйткені бәрі бұрын салынып қойған. Осыдан келіп Римде — әйелдер тамақ пісіретін ас үйінен және киім тігетін фабрикалардан шықпайды, ал еркектер қол қусырып қарап отырады. Өйткені ғасырлар өтсе де бұзылмайтын қажетті ғимараттардың бәрі соғылып қойған!

Атым шықты деп менменсіне бастасам болғаны, міндетті түрде әлдебіреу шығып ешкім емес екенімді бетіме басады. Рим папасы VI Павел — міне ғасырлар бойына аты өшпейтін нағыз танымал тұлға.

Махаббат маманы дейтін курс ашып алған жөн болар еді. Өмірде сұлулық, махаббат пен секске үйрететін курстар қажет және махаббат бұл курстағы негізгі пән болуы тиіс. Осыған дейін балаларға үлкендер қалай жыныстық қатынасқа түсетінін көрсетіп, оларға махаббат деген мағынасыз дүние екенін түсіндіру керек деп ойлап келдім. Бірақ ешкім олай жасамайды, өйткені махаббат пен секс — бұл нағыз бизнес. Қалай болмасын экран жақтауының ішіндегі және кітап бетіндегі секс, адамды төсектегі нағыз секске қарағанда қатты қоздырады. Сондықтан балалар секс жөнінде оқып, сосын шынайы өмірде істе асырып көрмекке ұмтылғанда, оларға өміріндегі ең қызықты кезең келмеске кеткенін баян етіңіз. Өйткені секс дегеніңіз бар болғаны оны бар ынтаңмен қалаған уақыттарды аңсау ғана екенін ұмытпағайсыздар.

Сапалы суреттерді тек таңғы төртте ғана түсіруге болады. Бірақ өкініштісі, мен түнгі он екіде жатып қаламын.

Егер мен «түнгі көбелекке» барар болсам, оған анекдот айтып беруі үшін ғана ақы төлер едім.

Кейбір көзі ашық оқыған адамдардың өзі зорлық көркем болуы мүмкін деп жатады. Бұл сөзді ешқашан түсіне алған емеспін, өйткені сұлулық дегеніміз бұл қандай да бір сәт қана және мен үшін сондай сәттер зорлықпен былғанбауы керек.

Қазіргі уақытта тіпті алаяқ болсаң да, жұрт сенімен санасатын болады.

Жұрттан еш қымсынбастан: «Ненің суретін салайын?» деп сұрап келдім. Өйткені поп-артқа идеялар тек сырттан ғана келеді. Сол үшін идеяны әлдебіреуден естіп я журналдан қарай салғанның арасында еш айырма жоқ деп ойлаймын.

Бізді көпшілік дұрыс түсінбей келді. Өйткені олар бізді ісімізге берілген, тірлігіне байыпты түрде қарайтын жандар деп ойласа керек. Ал іс жүзінде олай емес. Біз олай істейтін интеллектуал емеспіз ғой!

Менің тудырған өнерімді андерграунд деп санауға келмейді, өйткені мен ұдайы жұрт алдында жүргенді құп көремін.

Кейде адамдар бір ғана мәселенің ұзақ жылдар бойына өмірінің тас талқанын шығаруына мүмкіндік беріп жатады. Ал оның орнына жай ғана: «Онда тұрған дәнеңе жоқ» десе де болады. Бұл менің ең сүйікті ұранымның бірі.

Анам мені жақсы көрмейді. Онда тұрған дәнеңе жоқ.

Күйеуім мені сүймейді. Онда тұрған дәнеңе жоқ.

Үлкен жетістікке жеттім, бірақ сонда да жалғыз қалдым. Онда тұрған дәнеңе жоқ.

Холлудтағылардың поп-артты қулық деп санайтыны күлкімді келтіреді. Холлиуд?! Түсінсем бұйырмасын. Сонда олар түсіріп жүрген кино шынайы дүние ме?

Егер менде он жылға демалысқа шығатын мүмкіндік болса, онда ешқайда барғым келмес еді деп ойлаймын. Ондай жағдайда бар болғаны бөлмеме барып, жастыққа жантайып, теледидарымды қосып, «Ритц» крекерінің және «Рассел Стоверс» конфетінің бір қорабын ашып, көше бұрышында тұрған дүңгіршектен «Тв-гид» сынды журналдың жаңа шыққан бір санын алып, сосын телефон тұтқасын алып, танитын жандардың бәріне қоңырау шалып, «Тв-гид» бойынша телебағдарламаны қарап, теледидардан не көрсетіп жатыр, не көрсетті және нені көрсететінін айтуын сұрайтын едім.

Тамақ үстінде сөйлесу менің сүйікті ісім. Меніңше, жоғары деңгейдің белгісі осы болса керек.

Маған ақшаны бейберекетсіз ұстаған ұнайды. Умаждап-мыжып ұстағанды жөн көремін және ондай ақшаны қағаз қапшыққа сақтаған жөн.

Тәуелділіктің белгілері жөнінде газеттен оқыдым және оның бәрі менің бойымда бар болып шықты.

Егер әлдебіреу менің жасымды сұраса, сексенде деп айтыңдар. Ұдайы: «Ол сексенде» деңдер.

Біздің еліміздің ең бір керемет тұсы — Америка бай адамдар да кедейлер сатып алатын заттарды иемденетін дәстүрді бастап берді. Енді теледидар экранынан кока-коланы көріп қалсаңыз, аталған сусынды президенттің де ішетінін білесіз.

Бизнес — өнерден кейін орнайтын кезең.

Мына адам ұсқынсыз деп айтатындай жанды бұрын-соңды кезіктірген емеспін. Егер жұрт ұсқынсыз деп санайтын бір адам болса және оның көпшілікті күлдірте алатын бірнеше әзілі болса, онда ол жетістікке жете алады.

Бетіне опа-далап жақпаған әйелдерді құшырланып сүйіп алғың келеді. Мэрлиннің ернінен сүйгім келген емес, бірақ олар суретте өте әдемі көрінетінін мойындаймын.

Керемет күн. Жанымда бөгде ешкім жоқ. Жападан жалғыз жүріп, кеңсеге дейін жетуге батылым жетті. Кеңсе ішіндегі лифтің есігі ашылмай қалар жағдай туындайтын болса, сақтық үшін қолыма үшкір таяқты алып алдым. Бірдеңе боп қалса, сонымен есікті ашып аламын. Ал демалыс күндері кеңседе жалғыз болсам, ұдайы бір танысыма жұмысқа кеткенім жөнінде хабарлап қоямын.

Бұрын аңсарың ауған дүниеге деген құмарың басылса болғаны, ол қолыңа түседі. Бұл бұлтаруға келмейтін аксиома екеніне көзім жетті.

Алпысыншы жылдары жұрттың бәрі қызылды-жасылды дүниенің бәріне қызықты. Ал жетпісінші жылдары алған заттарын лақтыра бастады. Алпысыншы жылдары бәрі толып қалды. Ал жетпісінші жылдары — бәрі бос қалды;

Қонақ үйдегі бөлмеме көтерілсем, онда маған арнап «Леди Годива» шоколад қорабын қойып кетіпті және ондағы кәмпит салмасының бәрін жеп тастадым. Тағы бір шөлмек коньяк тұр екен. Оны да ішіп қойдым. Бөлмеде тұрған бір себет жеміс-жидектің ішіндегі кивиден де дым қалдырмадым. Тәттіге тойып, сосын, ұйықтап қалдым. Бірақ бар жоғы бір сағаттан кейін оянып кеттім.

Пол1¹Пол Морриссиi1938 жылы дүниеге келген — Уорхолдың айналысындағы америкалық авангардист-режиссер60-жылдардағы әзіл-оспақтың дағдаруына ЛСД кінәлі деп тапқан. Пол ЛСД қабылдап, әзілдей білу қабілетінен тек Тимоти Лири ғана айрылмады деп мәлімдеген еді.

Джим менің алғашқы эротикалық фильмімнің кейіпкері боламын деп айтқан (ол бір қызды ертіп әкеліп, екеуі камера алдында жыныстық қатынасқа түсуі керек болған). Бірақ уақыты келгенде, ол сөзінен тайқып кетті. Дегенмен Джим маған ұдайы жылы қабақ танытып, жақсы сөйлейтін еді. Алайда, байқауымша ол жұрттың бәрімен солай сөйлесіп, уәде бере беретін секілді.

Есімнен танып, ұйқыға кеткен кезімде санам іске қосылатын тәрізді. Мен армандап күткен ұлы сәт осы.

Осыдан он шақты жыл бұрын дүние салған болсам, культке айналған тұлға болар едім.