QALAM жобасы туралы

Еліміз бен Орталық Азия негізінен әралуан идеология мен діннің, мәдениеттер мен өркениеттердің тоғысқан орны болды. Мұның бәрі ғасырлар бойы осы өлкенің топырағына, тағдыр талайына өшпес із қалдырды. Батыс пен Шығыстың, Солтүстік пен Оңтүстіктің арасында дәнекер болған, түрлі ұлт, идея және тауар мидай араласқан Орталық Азия Үндістан, Иран және Қытайдан бастап ислам халифаттары, Осман империясы, Ресейге дейін көрші жатқан аймақтар мен мәдениеттерге айтарлықтай ықпал етті.

Тарихнама бір мезгілде әлемнің түрлі аймағында пайда болғанымен, тарих ғылымында ең алдымен Батыс Еуропаның деректеріне негізделіп әзірленген ұғым пен конструкциялар басымдық етеді. «Ұлттар», «этностар», «феодализм», «архаика», «Орта ғасыр», «модерн» сөзінің барлығы Қазақстанның, Жапонияның немесе Қытайдың өткенін баяндау үшін қаншалықты қолайлы? Әлемді сипаттайтын отарлық дискурс әлі күнге басым түсіп тұр. Күні бүгінге дейін Лондон, Париж немесе Мәскеуде қалыптасқан тарих Еуропа не АҚШ-та ғана емес, Азиядағы яки Африкадағы қалың бұқараның түсінігінде де үстемдік етеді.

Біз Қазақстандағы, сондай-ақ әлемдегі оқиғалар мен процестер контексінде өткенге үңілетін жаңа көзқарас ұсыну арқылы осы отаршылық призманы өзгертуге тырысамыз.

Біздің жобаға Қазақстан, АҚШ, Канада, Ұлыбритания, Сингапур, Қытай секілді түрлі елдің зерттеушілері қатысады. Жалпыға бірдей қабылданған барлық ғылыми стандартты сақтайтынымызға қарамастан, біз түрлі жанр мен формат тәсілін пайдаланып, тарихи хикаяларымызды тартымды етіп жазуға ұмтыламыз. Сайып келгенде, өткен шақтың қызықты әңгімесі ретінде пайда болған тарих эпостардың, күйлердің және аңыздардың арқасында ұзақ уақыт сақталды. Біз бұл дәстүрге құрметпен, түсіністікпен қараймыз. Өйткені тарих дегеніңіз — өте қызық.

Qalam-ды қазақ, ағылшын және орыс тілінде оқыңыз.